Eph 3 | NdeIBE | STEP | Ngenxa yalesisizatho, mina Phawuli, isibotshwa sikaKhristu uJesu ngenxa yenu lina bezizweni

Ephesians 3

UPhawuli Umtshumayeli Kwabezizweni

1 Ngenxa yalesisizatho, mina Phawuli, isibotshwa sikaKhristu uJesu ngenxa yenu lina bezizweni – 2 Ngeqiniso selizwile ngokuphathwa komusa kaNkulunkulu engawuphiwayo ngenxa yenu, 3 ukuthi ngaziswa imfihlakalo ngokwambulelwa, njengoba sengabhala ngokufitshane. 4 Nxa libala lokhu, lizakwanelisa ukuzwisisa umbono wami ngemfihlakalo kaKhristu, 5 engazange yaziswe abantu kwezinye izizukulwane njengoba khathesi isiveziwe nguMoya kubaphostoli abangcwele bakaNkulunkulu lakubaphrofethi.

6 Imfihlakalo le iyikuthi ngevangeli abezizweni bayizindlalifa bekanye labako-Israyeli, amalunga omzimba munye ndawonye, labahlanganyeli kuso isithembiso kuKhristu uJesu.

7 Mina ngaba yinceku yevangeli leli ngesipho somusa kaNkulunkulu engasiphiwa ngokusebenza kwamandla akhe. 8 Lanxa ngimncane kulabancane bonke babantu bakaNkulunkulu, umusa lo ngawunikwa: ukuba ngitshumayele kwabezizweni inotho kaKhristu engacubungulekiyo, 9 njalo ngikubeke obala ukuphatha kwami imfihlakalo le eyayifihliwe okweminyaka eminengi eyedlulayo kuNkulunkulu, owadala izinto zonke. 10 Injongo yakhe yayiyikuthi khathesi, ngebandla, ukuhlakanipha okukhulu kukaNkulunkulu kwaziswe ababusi labaphathi emibusweni yasezulwini, 11 ngokumayelana lenhloso yakhe engulaphakade ayifeza kuKhristu uJesu iNkosi yethu. 12 Kuye, njalo langokukholwa kuye singasondela kuNkulunkulu ngokukhululeka langesibindi. 13 Ngakho, ngiyalicela ukuba lingalahli ithemba ngenxa yokulihluphekela kwami, okuludumo kini.

Ukukhulekela Abase-Efesu

14 Ngenxa yalokhu ngiyaguqa phambi kukaYise, 15 lapho yonke imuli yamakholwa asezulwini lasemhlabeni ethola khona ibizo layo. 16 Ngiyakhuleka ukuba ngenotho yobukhosi bakhe aliqinise ngamandla ngoMoya wakhe emuntwini wenu wangaphakathi,

17 ukuze uKhristu ahlale ezinhliziyweni zenu ngokukholwa. Ngiyakhuleka njalo ukuba, ligxilile njalo liqinile ethandweni, 18 libe lamandla, kanye labangcwele bonke, ukuba liqedisise ububanzi lobude lokudepha kanye lokutshona kothando lukaKhristu, 19 lokuba lilwazi uthando lolu oludlula ukwazi – ukuze ligcwaliswe ngesilinganiso sokugcwala okupheleleyo kukaNkulunkulu.

20 Ngakho-ke, kuye lowo ongenza okukhulu kakhulu kulalokho esikucelayo kumbe esikucabangayo, mayelana lamandla akhe asebenzayo phakathi kwethu, 21 kakube lodumo kuye ebandleni lakuKhristu uJesu kuzizukulwane zonke, kuze kube nini lanini! Ameni.